Adam Smith

Dr Adam Smith (täift am 5. Juni^jul./16. Juni^greg. 1723 z Kirkcaldy, Grofschaft Fife, Schottland; † 17. Juli 1790 z Edinburgh) isch e schottische Filosoof gsi und e Pionier vo dr politische Ökonomii. Er isch äine vo de wichdigste Verdräter vo dr schottische Ufkläärig. Am bekanntiste isch dr Adam Smith für sini zwäi Wärk: Die Theorie der ethischen Gefühle (The Theory of Moral Sentiments) (1759) und Wohlstand der Nationen – Eine Untersuchung seiner Natur und seiner Ursachen (The Wealth of Nations, An Inquiry into the Nature and Causes of the Wealth of Nations) (1776). Wohlstand der Nationen wird as si magnum opus aagluegt und isch s erste modärne Wärk über Ökonomii. Dr Smith ghöört au hüte no zu de iiflussriichste Dänker in däm Fäld.^[1]

Dr Smith het Filosofii an dr Uniwersidäät Glasgow und am Balliol College, Oxford studiert, won er äine vo de erste Studänte gsi isch, wo vo de Stipändium profitiert het, wo dr John Snell iigfüert het. Won er fertig studiert het, het er an dr Uniwersidäät Edinburgh mit Erfolg öffentligi Vorlääsige abghalte und denn wäärend dr schottische Ufkläärig mit em David Hume zämmegschafft. Dr Smith isch z Glasgow Brofässer für Filosofii worde und het si Die Theorie der ethischen Gefühle afo schriibe. Spööter isch er dur ganz Öiropa gräist und het die Intellektuelle vo sinere Zit kennegleert. Wider dehäi het er denn zää Joor lang am Wohlstand der Nationen gschafft und es isch 1776 uusechoo. Er isch 1790 im Alter vo 67 gstorbe.

1. ↑ Davis, William L, Bob Figgins, David Hedengren, and Daniel B. Klein. "Economic Professors' Favorite Economic Thinkers, Journals, and Blogs," Econ Journal Watch 8(2): 126–146, May 2011.[1]